Yosi

para kang yosi
sa bawat hithit
lalong nakakaadik

sa pagguhit ng iyong usok sa aking lalamunan
humahalo sa aking dugo nang dahan-dahan
ramdam ko ang ligayang walang hanggan

sa bawat pagdaloy ng usok sa aking katawan
hinahaplos ang bawat kalamnan
hatid mo'y init sa lamig na nararamdaman

ikaw ang kasa-kasama
sa panahong nag-iisa
sa dilim ng gabi, sa nangungulilang umaga

ikaw ang yosi
na nagbibigay-sigla
sa damdaming patang-pata

ikaw ang yosi
na nais kong laging kapiling
na sa pantasya ko'y laging kasiping
ngunit sa buhay ko'y
unti-unti ring kumikitil.