Minsan May Isang Batang Babae

Minsan, may isang batang babae...

Ipinangalan siya sa isang bulaklak. Pinalaking animo'y isang prinsesa. Pinangarap niya ring maging "Little Miss Philippines". Ngunit siya ay natalo. Ayos lang.. Konsolasyon niya ay isang bagong barbie doll.

Minsan, may isang batang babae...

Kung bihisan siya'y daig pa ang isang manika. Ang buhok niya ay nakatali sa dalawang pony tail. Bawat tali ay may ribbon na kulay pink. Lagi siyang pinakakanta sa harap ng mga bisita. Pinasasayaw sa saliw ng musika ni Madonna.

Minsan, may isang batang babae...

Nagka-boypren siya ng apat. Hindi pa kasama doon ang tatlong ka-fling. Kinilig, tumili sa mga pelikula ni Rico Yan noon at ni Piolo Pascual ngayon. Pinangarap na maging Bb. Pilipinas Universe. Kung hindi, pwede na rin ang makapag-asawa ng kahit PBA player.

Ngayon ay may isang babae...

Babaeng pinapangarap ng kahit na sinong lalaki. Mapungay ang mga mata, mapula ang mga labi, mahaba ang buhok, mabini ang kilos...

Naglalakad sa isang landasing tila walang hanggan. Patungo sa isang kinabukasang puno ng magaganda at matatamis na mga pangarap.

Tanging baon sa paglalakbay ay pag-ibig...

Mahigpit.. damang-dama ang init..

Kahawak-kamay ang minsa'y naging isang batang babae...