Panaghoy

Nais kong lumayo sa mundong ito
na puno ng hinagpis, hirap, at sakit

Gusto kong lumaya
mula sa madilim na bilangguang aking kinalalagyan

Humalagpos sa gapos
ng tanikalang bumibilanggo sa aking katawan
gapos na sumasakal, pumapatay sa aking puso at isipan

Nais kong kalimutan
lahat ng ala-alang
masakit, mapait, at sumusugat sa katauhan

Humiwalay mula
sa mga pagkakasalang
dumudungis, kumikitil sa aking kaluluwa

Nais kong umahon
sa kinasasadlakang bangin
ng mga dusang tila walang hanggan

At ihimlay nang tuluyan
yaring pagal kong katawan...